Es is immer bloß a Bamm

Es is immer bloß a Bamm, den wussi wechmachn, a Heggn
Immer bloß a Brunna, a Gärdla, a Pflasder, a Maierla, a Briggla
Es is immer bloß a alds Haisla, des wussi eireißn denna, a Baggoofn
A Milchrambm, a Woochhaisla, a Staagreiz, a Scheierla, a Keller
Es is immer bloß a Booch, wu begroodichd werd, bloß a Fuhr
A Weech, der wu verleechd werd, a Hohlgaß, a Hubbl, a Ranga
Es is immer bloß a Agger, wu wechkummd, a Wiesn, a Wäldla
Es is immer bloß a Bauer, wu aufgeem dudd, a Hof, wu eigehd
A alder Grauderer, wu widder wech is, a Werdschafd na wenger
A Loodn widder fodd, a guuda Haud, a komischa Kabbm
Aaner allaa auf weider Fluur, a ganz einger Schlooch

Immer sinns bloß a boor Veecherle un Viecher, wu fodd sinn
A boor Pfiffer un Graider un Blumma, wummer nämmer sichd
Immer bloß a Stiggla, a Drimmla is widder fodd, nedd di Weld
Doo is nedd schood drum, soongs, nedd weider draagisch
Des hadd wechkerd, des ald Zeich, schood um a jeds Word
Pfeif auf die boor Greedn doo, soongs, bloß a boor Zergwedschda
Des Glumb is kann Schuß Bulfer weerd, a Schlooch ins kald Wasser

Immer bloß a bißla, a weng wos, nix weider
Immer hald bloß a Bamm, a Haisla, a Baierla wenger
Bloß midder Zeid hald werd alles ganz annersch
Un dernooch hadd widder kanner doo dervoo wos gwißd
Hadds widder kanner so kumma sehng, wies sei werd
Haddmer widder rein goor nix machn kenna dergeeng

Bloß am End stenners na dodd mid gwaschna Häls un beeglda Hoosn
Un mid aufgrissna Aang stierns widdi Eelgetzn in di Weldgschichd
Gratzn middi Finger am Lagg un am Gloos un am Blech un am Deer
Un suhng nooch an bißla, bloß an Fitzerla vonnam ganz annern Leem

 

Mit freundlicher Genehmigung des Autors und Verlags

Aus Helmut Haberkamms Gedichtband "Lichd ab vom Schuß",
erschienen im Ars Vivendi Verlag Cadolzburg (1999).